petri

Ek is tans vierde jaar medies aan Stellenbosch. Op die Tygerbergse kampus is ek ouer as die ander studente omdat ek eers in 2009 aan die Universiteit van Pretoria ‘n graad in meganiese ingenieurswese behaal het, waarna ek drie jaar lank in Sandton as ‘n raadgewende ingenieur gewerk het.

As 28-jarige student geniet ek die tweede kans op die studentelewe. Ek is vanjaar as huiskomiteelid verkies; is ook betrokke by die kampuskerk en het saam met vriende ‘n studente-organisasie gestig vir die belangstelling en promovering van orgaanoorplanting. My stokperdjies sluit onder andere in gholf, tennis, fotografie en kitaar.

Ek het besluit om ‘n dokter te word toe ek in 2010 in die hospitaal opgeneem is weens ‘n ongewone niersiekte. Drie spesialiste en ‘n huisdokter het die diagnose gemaak – ‘n proses wat my belangstelling geweldig geprikkel en my laat besluit het om dokter te word.

Ek het in Nigel grootgeword, waar ek 7 onderskeidings in matriek behaal het; Dux-leerling en onderhoofseun was. Ek sal graag eendag in interne geneeskunde wil spesialiseer (en sub-spesialiseer in nefrologie, of te wel aangaande die niere).

Aan die Noordelike Helpmekaar Studiefonds my hartlike dank vir die aanhoudende ondersteuning wat ek kan geniet!