WernerEk wil begin deur vir Helpmekaar uit my hart te bedank vir die geleentheid wat julle skep deur die finansiële ondersteuning wat julle verleen.

Hierdie ondersteuning maak dit vir my moontlik om my te bekwaam sodat ek in die toekoms my passie kan uitleef. Dit is om deel te wees van die genesingsproses van ander mense.

Ek is tans ‘n vierde jaar mediese student by SMU. Ek werk regtig baie hard en alhoewel my studies feitlik 90% van my tyd in beslag neem, geniet ek dit ongelooflik baie. Die interaksie met mede-studente van verskillende kulture en gelowe glo ek is ook deel van my voorbereidingspad om in die toekoms pasiënte van verskillende kulture en gelowe beter te verstaan en by te staan.

Die feit dat ek elke jaar goeie uitslae van 70% plus behaal, motiveer my om deurgaans my beste te lewer. Ek sien myself nie net as ‘n dokter in die toekoms nie, maar as ‘n student wat op pad is om as ‘n spesialis te kwalifiseer. Ek sal myself graag as Neuroloog wil bekwaam wat ‘n groot verskil sal maak in die samelewing, asook in mense se lewens.

Dit is ‘n ongelooflike voorreg vir my om Helpmekaar se merietebeurs te ontvang. Dit spoor my beslis aan om nog harder te werk, positief te bly en daar te wees vir elke pasiënt waarmee ek as student reeds paaie kruis.

Ek is positief oor die toekoms!!