My besluit om spraakterapie te studeer, het met ’n interessante draai gekom.
Ná my matriekjaar
in 2014 het ek aanvanklik besluit om ’n jaar oorsee, in Suid-Korea, te gaan
werk om sodoende ’n beter blik oor my toekoms te kry. In die jaar wat ek in die
Ooste klasse in Engels gegee het, het ek besef ek wil graag mense – veral
kinders – help wat sukkel om te kommunikeer.
Al kom ek uit ’n familie wat besaai is met onderwysers en joernaliste, het ek
besef ek sal liewer individuele aandag aan leerders wil gee. Daarom was spraakterapie
‘n natuurlike loopbaankeuse.
Die Noordelike Helpmekaar-Studiefonds het my in staat gestel om hierdie droom na te jaag.
Ek is tans ’n derdejaarstudent op Stellenbosch-Universiteit se Tygerberg-kampus en ek geniet dié geleentheid verskriklik!
In my kursus werk ons nie net met kinders wat sukkel met basiese spraakvaardighede nie, maar ook met volwassenes wat ’n verskeidenheid van kommunikasieprobleme het weens probleme soos beroerte . Ons leer ook hoe om te werk met gehoorgestremdes en met babas wat byvoorbeeld sukkel om te sluk. Dit is ’n voorreg om mense te help sodat hulle hul hindernisse kan oorkom.